បញ្ចូលអត្ថបទ ៖ ច័ន្ធូ
ថ្ងៃសៅរ៏ ទី១៧ ខែឧសភា ឆ្នាំ២០១៤ ម៉ោង ១៣:៣៨
កោះសន្តិភាព
ក្រុមជនសង្ស័យសមត្ថកិច្ចឃាត់ខ្លួន
ខេត្តប៉ៃលិន ៖បន្ទាប់ពីទទួលពាក្យបណ្តឹងពីឪពុកម្តាយក្មេងស្រីរងគ្រោះនិងបញ្ជាពីលោក ជុំ សែនសទ្ធាព្រះរាជអាជ្ញាអមសាលាដំបូងខេត្ត លោកវរសេនីយ៍ទោ ឆម វ៉ាន់ធីនាយការិយាល័យព្រហ្មទណ្ឌកម្រិតធ្ងន់នៃស្នងការនគរបាលខេត្តបានដឹកនាំកម្លាំងក្រោមឱវាទចុះស្រាវជ្រាវឃាត់ខ្លួនក្មេងទំនើង១ក្រុមមានគ្នាចំនួន៦នាក់ជាបន្តបន្ទាប់កាលពីថ្ងៃទី១៦ ឧសភាក្រោយពីពួកគេបបួលក្មេងស្រី អាយុ១៤ឆ្នាំ ផឹកស្រាស្រវឹងរួចធ្វើសកម្មភាពរំលោភសេពសន្ថវៈរហូតបានសម្រេចគ្រប់គ្នា ។
ជនសង្ស័យទី១-ឈ្មោះ ញឹម ផាន ភេទប្រុសអាយុ១៧ឆ្នាំ ,ទី២-ឈ្មោះ ទី វីន ភេទប្រុស អាយុ២៣ឆ្នាំ ,ទី៣-ឈ្មោះ ឃុន អៀប ភេទប្រុស អាយុ២៣ឆ្នាំទាំង៣នាក់មុខរបរកសិករ រស់នៅភូមិអូរច្រាលិចសង្កាត់បរយ៉ាខា ក្រុងប៉ៃលិន ,ទី៤-ឈ្មោះ ជួន ម៉ៅ ហៅគល់ភេទប្រុស អាយុ១៦ឆ្នាំជាសិស្សរៀននៅវិទ្យាល័យហ៊ុនសែនក្រុងទេពនិម្មិត ,ទី៥-ឈ្មោះ សុខពៅ ហៅហ៊ីង ភេទប្រុស អាយុ១៥ឆ្នាំ ជាកសិករទាំងពីរនាក់រស់នៅភូមិអូរតាពុកក្រោម សង្កាត់ទួលល្វាក្រុងប៉ៃលិន និងទី៦-ឈ្មោះ ញៀន ឧត្តម ភេទប្រុស អាយុ១៩ឆ្នាំជាកសិករទាំង៣នាក់ រស់នៅភូមិចំការកាហ្វេ សង្កាត់ទួលល្វាក្រុងប៉ៃលិន ។
ក្រោយពីឃាត់ខ្លួនជនសង្ស័យខាងលើត្រូវសមត្ថកិច្ចកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធីកាលពីវេលាម៉ោង៩និង៣០នាទីព្រឹកថ្ងៃទី១៧ ឧសភា ។
គួររំលឹកថាក្មេងស្រីម្នាក់មានអាយុ១៤ឆ្នាំត្រូវគេប្រទះឃើញដេកសន្លប់នៅក្បែរខាងក្រោយផ្នូរខ្មោចចិនស្ថិតនៅក្នុងភូមិវត្ត សង្កាត់ប៉ៃលិនក្រុងប៉ៃលិន កាលពីវេលាម៉ោង៦ព្រឹកថ្ងៃទី១៦ ឧសភាបន្ទាប់ពីត្រូវក្មេងទំនើងមានគ្នាប្រហែល៦នាក់ស្គាល់គ្នាជាមួយក្មេងស្រីរងគ្រោះល្បួងឱ្យនាងផឹកស្រារហូតដល់ស្រវឹងរួចដឹកតាមម៉ូតូនាំទៅរំលោភម្តងម្នាក់ៗរហូតបានសម្រេចគ្រប់គ្នាហើយរត់គេចខ្លួនបាត់ស្រមោល ។ក្មេងស្រីរងគ្រោះ អាយុ១៤ឆ្នាំជាអាជីវករលក់ដូរនៅខាងជើងផ្សារសាមគ្គី ហៅប៉ាហ៊ីរស់នៅក្នុងសង្កាត់ប៉ៃលិន ក្រុងប៉ៃលិន ។
ខេត្តប៉ៃលិន ៖ បន្ទាប់ពីទទួលបញ្ជាពីលោក ជុំសែនសទ្ធា ព្រះរាជអាជ្ញាអមសាលាដំបូងខេត្ត លោកវរសេនីយ៍ទោ ឆមវ៉ាន់ធីនាយការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ត បានដឹកនាំកម្លាំងក្រោមឱវាទ តាមប្រមាញ់និងចាប់ឃាត់ខ្លួនក្មេងទំនើង១ក្រុម មានគ្នាចំនួន៦នាក់ដែលពាក់ព័ន្ធនឹងករណីល្បួងក្មេងស្រីអាយុ១៤ឆ្នាំឱ្យផឹកស្រារហូតស្រវឹងលែងដឹងខ្លួនរួចនាំគ្នាចាប់រំលោភម្តងម្នាក់ៗរហូតបានសម្រេចគ្រប់ៗគ្នា ។
ក្រោយពីទទួលពាក្យបណ្តឹងពីឪពុកម្តាយក្មេងស្រី សមត្ថកិច្ចបានចេញប្រតិបត្តិការចាប់ឃាត់ខ្លួនក្មេងទំនើងទាំង៦នាក់ជាបន្តបន្ទាប់ ចាប់តាំងពីវេលាម៉ោង៦ និង៣០នាទីព្រឹកថ្ងៃទី១៦ ឧសភា រហូតដល់វេលាម៉ោង៦ល្ងាច ថ្ងៃដដែល ។នៅវេលាម៉ោង៩ និង៣០នាទីព្រឹក ថ្ងៃទី១៧ ឧសភាសមត្ថកិច្ចបានកសាងសំណុំរឿងបញ្ជូនក្មេងទំនើងទាំង៦នាក់ទៅអយ្យការអមសាលាដំបូងខេត្ត ចាត់ការតាមច្បាប់ ។ក្មេងស្រីអាយុ១៤ឆ្នាំ ជាអ្នកលក់បន្លែនៅខាងជើងផ្សារសាមគ្គីហៅផ្សារប៉ាហុី រស់នៅក្នុងសង្កាត់ប៉ៃលិន ក្រុងប៉ៃលិន ។ចំណែកក្មេងទំនើងទាំង៦នាក់នេះ មាន ១-ឈ្មោះ ញឹម ផានអាយុ១៧ឆ្នាំ ជាកសិករ ២-ឈ្មោះ ទី វីន អាយុ២៣ឆ្នាំ ជាកសិករ៣-ឈ្មោះ ឃុន អៀប អាយុ២៣ឆ្នាំ ជាកសិករ ទាំង៣នាក់រស់នៅក្នុងភូមិអូរច្រាលិច សង្កាត់បរយ៉ាខា ក្រុងប៉ៃលិន ។
៤-ឈ្មោះ ជួន ម៉ៅ ហៅគល់ អាយុ១៦ឆ្នាំជាសិស្សវិទ្យាល័យ ៥-ឈ្មោះ សុខ ពៅ ហៅហុីង អាយុ១៥ឆ្នាំជាកសិករ ទាំង២នាក់ រស់នៅក្នុងភូមិអូរតាពុកក្រោមសង្កាត់ទួលល្វា ក្រុងប៉ៃលិន ។ ៦-ឈ្មោះ ញៀន ឧត្តម អាយុ១៩ឆ្នាំជាកសិករ រស់នៅក្នុងភូមិចំការកាហ្វេ សង្កាត់ទួលល្វាក្រុងប៉ៃលិន ។ សូមបញ្ជាក់ថា ក្មេងទំនើងទាំង៦នាក់នេះបានល្បួងក្មេងស្រីទៅរំលោភកាលពីវេលាម៉ោង១រំលងអធ្រាត្រឈានចូលថ្ងៃទី១៦ ឧសភា នៅខាងក្រោយក្បែរម៉ុងសពចិនក្នុងភូមិវត្ត សង្កាត់ប៉ៃលិន ក្រុងប៉ៃលិនហើយក្រោយពីធ្វើសកម្មភាពរំលោភរួចមកពួកគេក៏នាំគ្នារត់គេចខ្លួនបាត់ស្រមោល ។ លុះនៅវេលាម៉ោង៦និង៣០នាទីព្រឹក ថ្ងៃដដែលមានកសិករម្នាក់ជិះម៉ូតូទៅមើលចម្ការតាមផ្លូវនោះប្រទះឃើញក្មេងស្រីដេកសន្លប់ម្នាក់ឯង ក៏ដាស់ឱ្យងើបសួរនាំរួចក៏បញ្ជូនទៅកាន់គ្លីនិកឯកជនមួយនៅក្រុងប៉ៃលិន ដើម្បីព្យាបាល។ ក្រោយពីសួរនាំដឹងថា នាងត្រូវក្មេងទំនើងព្រួតគ្នារំលោភឪពុកម្តាយនាងក៏ដាក់ពាក្យប្តឹងទៅនគរបាលព្រហ្មទណ្ឌកម្រិតស្រាលឱ្យចាប់ឃាត់ខ្លួនជនល្មើសតែម្តង ។
ក្មេងស្រីនិយាយថា នៅវេលាម៉ោង៦និង៣០នាទីល្ងាច ថ្ងៃទី១៥ ឧសភានាងបាននាំមិត្តភក្តិស្រីៗអាយុប្រហែលគ្នាចំនួន៤-៥នាក់ចេញពីផ្ទះទៅលេងនៅសួនកុមារទល់មុខសាលាខេត្តក្នុងភូមិប៉ាហុីត្បូង សង្កាត់ប៉ៃលិន ក្រុងប៉ៃលិន ។ពួកនាងនាំគ្នាអង្គុយលេងនៅទីនោះរហូតដល់ម៉ោង១០យប់មិត្តភក្តិរបស់នាងទាំងអស់ក៏បានត្រឡប់ទៅផ្ទះវិញរៀងៗខ្លួន ។ពេលនោះនាងនៅតែម្នាក់ឯងអង្គុយលេងជាមួយនឹងក្រុមក្មេងទំនើងចំនួន៦នាក់ ដែលនាងធ្លាប់ស្គាល់ពួកគេមួយចំនួនជាយូរមកហើយតែមិនចាំឈ្មោះទេ ។ ក្មេងស្រីរងគ្រោះរៀបរាប់ទៀតថាពេលនោះស្រាប់តែមានក្មេងទំនើងម្នាក់ ទៅទិញស្រាពីរដបយកមកដាក់អង្គុយនាំគ្នាផឹកនៅលើសួន ហើយបបួលនាងឱ្យផឹកដែរប៉ុន្តែនាងប្រកែកមិនព្រឹមផឹកទេ ព្រោះមិនធ្លាប់ផឹក ។ប៉ុន្តែពួកគេចេះតែបង្ខំឱ្យនាងសាកផឹកមួយកែវ ហើយមួយកែវទៀតហើយនាងក៏ផឹកតាមគេរហូតអស់ជិត១ដប ។ បន្ទាប់ពីផឹករួចនាងក៏ស្រវឹងមើលអ្វីមិនឃើញ ហើយសន្លប់ទៅ ។ ក្រោយមកស្រាប់តែពួកគេទាំងនោះបានដឹកនាងតាមម៉ូតូយកទៅលើភ្នំយ៉ាតនិងរំលោភម្តងម្នាក់ៗនៅខាងក្រោយម៉ុងសពចិនរួចក៏ទុកនាងចោលនៅទីនោះ ។
លោកវរសេនីយ៍ទោ ឆម វ៉ាន់ធី ឱ្យដឹងថាក្រោយពីទទួលពាក្យបណ្តឹងភ្លាមនិងទទួលបញ្ជាពីលោកព្រះរាជអាជ្ញាអមសាលាដំបូងខេត្តខាងលោកបានចូលទៅសួរនាំក្មេងស្រី ហើយនាងប្រាប់ថាមិនស្គាល់ឈ្មោះក្មេងទំនើងទាំងនោះទេ គ្រាន់តែដឹងថាក្នុងចំណោមក្មេងទំនើងទាំងនោះ នាងចំណាំមុខយុវជនម្នាក់ដែលធ្លាប់ឃើញរាំឱ្យក្រុមតន្ត្រីប្រចាំក្រុងប៉ៃលិន ។ ពេលនោះសមត្ថកិច្ចបានឆែករកមើលតាមហ្វេសប៊ុក ដែលក្រុមរាំនេះបង្ហោះហើយឃើញរូបភាពក្រុមរាំ រួចយកទៅឱ្យក្មេងស្រីពិនិត្យមើលទើបនាងស្គាល់មុខជននេះ ហើយសមត្ថកិច្ចក៏តាមចាប់ខ្លួនដល់ផ្ទះ ។បន្ទាប់មក ក៏បន្តចាប់ខ្លួនបក្សពួកគេជាបន្តបន្ទាប់ចាប់តាំងពីវេលាម៉ោង៦ និង៣០នាទីព្រឹក ថ្ងៃទី១៦ ឧសភារហូតដល់វេលាម៉ោង៦ល្ងាច ថ្ងៃដដែល ទើបចាប់បានទាំងអស់ ។
ក្រោយពេលចាប់ឃាត់ខ្លួន ពួកគេសារភាពថា ពិតជាបានរំលោភក្មេងស្រីម្តងម្នាក់ៗមែន ៕